गुणबहादुर रोका
सुलीकोट (गोरखा), भदौ १४ गते । गोरखामा आगलागी हुँदा एक घर जलेर पूर्ण रूपमा नष्ट भएको छ । आइतबार बिहान करिब ४ बजे अचानक घरमा आगलागी हुँदा गोरखा नगरपालिका–३, नारेश्वरमा स्थानीय सीता अर्यालको घर जलेर पूर्ण रूपमा नष्ट भएको हो ।

जिल्ला प्रहरी कार्यालय गोरखाका प्रहरी नायब उपरीक्षक राजकुमार श्रेष्ठका अनुसार ढुङ्गा–माटोले बनेको कच्ची घरमा आगलागी हुँदा घर पूर्ण रूपमा नष्ट भएको हो ।

आगलागीबाट घरभित्र रहेका अन्नपात, लत्ताकपडा, भाँडाकुँडालगायतका सामान जलेर नष्ट भएका छन् । आगलागीबाट मानवीय क्षति भने नभएको जिल्ला प्रहरी कार्यालय गोरखाले जनाएको छ ।

आगलागी भएको केही समयमै स्थानीय र प्रहरी घटनास्थलमा पुगेर आगो नियन्त्रणमा लिएका थिए ।

स्थानीय युवा किसान थापाका अनुसार विद्युत् लाइनबाट निस्किएको आगो फैलिँदा आगलागी भएको अनुमान गरिएको छ । आगलागीबाट टिनको छानो भएको घर जलेर खरानी भएको छ ।

घटनाबाट भएको क्षतिको विवरण सङ्कलन भइरहेको तथा आगलागीको कारणबारे थप अनुसन्धान भइरहेको जिल्ला प्रहरी कार्यालय गोरखाले जनाएको छ ।