कोशीमा ‘हाइ अलर्ट’ बीच प्रतिनिधिसभा निर्वाचन

विराटनगर – कोशी प्रदेशमा हुने प्रतिनिधिसभा निर्वाचनलाई लक्षित गर्दै सुरक्षा संयन्त्रले अभूतपूर्व सतर्कता अपनाएको छ। ‘मास्टर प्लान’ लागू गर्दै बहु–तहको सुरक्षा घेरा तयार पारिएको छ भने प्रदेशभर ३५ हजारभन्दा बढी सुरक्षाकर्मी प्रत्यक्ष रूपमा मैदानमा उत्रिएका छन्।प्रदेशका २८ वटै निर्वाचन क्षेत्रमा भयरहित र निष्पक्ष मतदान सुनिश्चित गर्न नेपाल प्रहरी, सशस्त्र प्रहरी बल र नेपाली सेनाबीच त्रिपक्षीय समन्वयलाई उच्च प्राथमिकता दिइएको छ। सुरक्षा निकायका अनुसार यसपटकको रणनीति ‘दृश्य’ र ‘अदृश्य’ दुवै रूपमा कडा बनाइएको छ।

३५ हजारभन्दा बढी सुरक्षाकर्मी परिचालन

प्रदेश प्रहरी कार्यालय विराटनगरका अनुसार निर्वाचन सुरक्षाका लागि मात्र ३५ हजारभन्दा बढी जनशक्ति खटाइएको छ। तीमध्ये १२ हजार नेपाल प्रहरी र २३ हजार म्यादी प्रहरी परिचालित छन्।यसका अतिरिक्त सशस्त्र प्रहरी बलका तर्फबाट ८ हजारभन्दा बढी जनशक्ति तैनाथ गरिएको छ। आवश्यकता परे थप रिजर्भ फोर्स परिचालन गर्न सकिने व्यवस्था मिलाइएको सुरक्षा स्रोतले जनाएको छ।सुरक्षा समितिको मूल्यांकनअनुसार प्रदेशका १ हजार ९०७ मतदान स्थलमध्ये ४३९ स्थललाई अति संवेदनशील सूचीमा राखिएको छ। ती स्थानमा अतिरिक्त सुरक्षा घेरा, निरन्तर निगरानी, नियमित गस्ती तथा आकस्मिक जाँच कडाइ गरिएको छ।

मोबाइल टोली र रिजर्भ फोर्स तयारी अवस्थामा

प्रदेश प्रहरी कार्यालय कोशीका प्रमुख डीआईजी विनोद घिमिरेले सानातिना घटनालाई पनि गम्भीरतापूर्वक लिएर तत्काल ‘रेस्पोन्स’ गर्ने तयारी गरिएको जानकारी दिए।उनका अनुसार सम्भावित जोखिमलाई मध्यनजर गर्दै मतदानअघि, मतदानका दिन र मतगणनासम्म विशेष सुरक्षा योजना लागू गरिनेछ। “मोबाइल टोली र रिजर्भ फोर्स चौबिसै घण्टा तयारी अवस्थामा छन्। सूचना संकलन र विश्लेषणलाई पनि तीव्र बनाइएको छ,” उनले भने।उनले मतदातालाई ढुक्क भएर मतदान गर्न आग्रह गर्दै कुनै पनि प्रकारको अवाञ्छित गतिविधि सह्य नहुने स्पष्ट पारे।

३५ लाखभन्दा बढी मतदाता

प्रदेशभर ३५ लाख ७४ हजार २८६ मतदाता रहेका छन्। मतदानका लागि ४ हजार २७० मतदान केन्द्र कायम गरिएका छन्। सबै केन्द्रमा सुरक्षाकर्मीको प्रत्यक्ष उपस्थिति रहनेछ भने अति संवेदनशील र दुर्गम क्षेत्रमा थप सुरक्षा बल परिचालन गरिने जनाइएको छ।सुरक्षा निकायका अनुसार हाल प्रदेशको समग्र सुरक्षा अवस्था सन्तोषजनक छ। तर, निर्वाचनजस्तो संवेदनशील समयमा कुनै पनि जोखिम नलिन उच्च सतर्कता अपनाइएको छ।

‘दृश्य’ र ‘अदृश्य’ रणनीति

यसपटक सुरक्षा संयन्त्रले ‘दृश्य’ अर्थात् खुला गस्ती, चेकजाँच, सुरक्षाकर्मीको उपस्थिति र ‘अदृश्य’ अर्थात् गोप्य निगरानी, सूचना संकलन र विश्लेषणलाई समान रूपमा जोड दिएको जनाएको छ।सीमा नाका, प्रमुख राजमार्ग, संवेदनशील बस्ती र भीडभाड हुने क्षेत्रहरूमा निगरानी बढाइएको छ। आवश्यक परे हेलिकप्टर र विशेष टोली परिचालन गर्ने तयारीसमेत रहेको सुरक्षा स्रोतले संकेत गरेको छ।सुरक्षा निकायको दाबी छ—यो रणनीतिले मतदान प्रक्रिया शान्तिपूर्ण, निष्पक्ष र व्यवस्थित बनाउन महत्वपूर्ण भूमिका खेल्नेछ।कोशी प्रदेशमा निर्वाचनको माहोल तातिरहेको बेला सुरक्षा संयन्त्रको यस्तो कडा तयारीले कुनै पनि प्रकारको अवाञ्छित गतिविधिलाई निस्तेज पार्ने अपेक्षा गरिएको छ। अब मतदाताको हातमा छ—निर्भय वातावरणमा लोकतन्त्रको उत्सव मनाउने अवसर।