जजन्युज/भाेक्राहा (सुनसरी) ।
​सुरक्षाकर्मीहरूले पछिल्लो समय लागूऔषध तथा अवैध तस्करी नियन्त्रणमा देखाएको शून्य सहनशीलता र कडा कदमपछि त्रसित बनेका समूहहरूले सुरक्षा निकायको मनोबल गिराउन र आम जनमानसमा भ्रम छर्न अतिरञ्जित प्रचारबाजी सुरु गरेका छन्।
​सुनसरीको भोक्राहा नरसिंह गाउँपालिका–४ स्थित नहर चोक नजिकैबाट बरामद गरिएको ठूलो परिमाणको प्रतिबन्धित लागूऔषध र मोटरसाइकल नियन्त्रणमा लिने क्रममा स्थानीयस्तरमा सिर्जना गर्न खोजिएको अशान्तिको घटनाले यस कुरालाई पुष्टि गरेको छ।
​सशस्त्र प्रहरी बल नेपाल नं. ४ गण हेडक्वार्टर सुनसरीबाट खटिएको विशेष गस्ती टोलीले विशेष सूचनाका आधारमा कात्तिक ४ गते मंगलबार अपराह्न अन्दाजी २:३० बजे भोक्राहा नरसिंह–४ स्थित पुरानो स्टार होटल नजिकै शंकास्पद अवस्थामा रहेको प्र.१ ०२–०४७ प १४७२ नम्बरको सेतो–कालो रङको २०० सीसी Pulsar NS मोटरसाइकल पछ्याएको थियो।
​सुरक्षाकर्मीले पछ्याएपछि चालकले मोटरसाइकल सोही भवन परिसरमा पार्क गरी भित्र पसेर भित्री चेन गेट लगाएका थिए। सशस्त्र प्रहरीले बारम्बार बोलाउँदा पनि चालक बाहिर नआएपछि प्रहरी टोलीले मोटरसाइकललाई कम्पाउन्डबाट निकाली १५-२० मिटर दक्षिणतर्फ रहेको पूर्व-पश्चिम राजमार्ग क्षेत्रमा ल्याएको थियो।
​सोही क्रममा अपराह्न २:४५ बजेतिर ५० देखि ५५ जनाको संख्यामा भेला भएका स्थानीय व्यक्तिहरूले सुरक्षाकर्मीको टोलीलाई घेराउ गर्दै डिउटीमा बाधा पुर्‍याएका थिए। घटनालगत्तै नेपाल प्रहरीको टोलीसमेत पुगेर संयुक्त रूपमा मोटरसाइकल चेकजाँच सुरु गरेको थियो।
​तर, स्थिति सामान्य बनाउनुको साटो उक्साहटमा आएका केही व्यक्तिहरूले बरामद हुन लागेको लागूऔषध लुटपाट गर्ने र मुख्य दसी प्रमाण नै नष्ट गर्ने प्रयास गरेका थिए। उनीहरूले ‘प्रहरी प्रशासन मुर्दावाद’ जस्ता नाराबाजी गर्दै घटनालाई मोड्न नेपाल प्रहरी र सशस्त्र प्रहरीकै मिलोमतोमा निर्दोषलाई फसाउन खोजिएको भन्दै अनर्गल र कपोलकल्पित अफवाह फैलाउन थालेका थिए।
​स्थानीयको अनपेक्षित विरोध र दसी प्रमाण नष्ट गर्ने प्रयासका बाबजुद सशस्त्र प्रहरी सहायक हवल्दार नरबहादुर खड्काले तानातानका क्रममा भुइँमा खसेको कालो प्लास्टिकको पोको सुरक्षित रूपमा टिपेर पुनः मोटरसाइकलमै राखी सूक्ष्म चेकजाँच अघि बढाएका थिए।
​प्रहरीको विस्तृत चेकजाँचका क्रममा उक्त कालो प्लास्टिकभित्र लुकाइछिपाइ राखिएको भारी परिमाणको प्रतिबन्धित लागूऔषध फेला परेको छ। बरामद लागूऔषधमा:
​नाइट्रोजेपाम (Nitrozepam) ट्याब्लेट: १० पत्ता (९९ पिस)
​ट्रामेडोल (Tramadol) ट्याब्लेट: १६ पत्ता (१६० पिस)
​स्पासमो (Spasmo) ट्याब्लेट: ४ पत्ता (३२ पिस)
​बरामद गरिएको उक्त एनएस मोटरसाइकल र सम्पूर्ण प्रतिबन्धित लागूऔषधलाई नियन्त्रणमा लिई कानुनी प्रक्रिया तथा थप अनुसन्धानका लागि जिल्ला प्रहरी कार्यालय सुनसरीमा बुझाइएको छ।
​सुरक्षा निकायको कडा कदम र भ्रम सिर्जना गर्ने प्रयास
​सुनसरी जिल्लाका प्रमुख सीमावर्ती क्षेत्र तथा सहरी भेगहरूमा पछिल्लो समय लागूऔषध ओसारपसार, प्रयोग र अवैध तस्करी नियन्त्रणका लागि सशस्त्र प्रहरी र नेपाल प्रहरीलाई अत्यन्त निर्मम र आक्रामक रूपमा परिचालन गरिएको छ। सुरक्षा निकायको यो कडा नीतिका कारण सीमापारबाट हुने illegal आपूर्ति र गिरोहको सञ्जाल भत्किन थालेको छ।
​सोही बौखलाहटमा परेर गिरोह र तिनका समर्थकहरूले सर्वसाधारणलाई उक्साउने, प्रहरीविरुद्ध भ्रम फैलाउने र निष्पक्ष कारबाहीलाई ‘फसाइएको’ भन्दै अतिरञ्जित प्रचारप्रसार गर्ने दुष्प्रयास गरिरहेको स्थानीय बुद्धिजीवीहरूको भनाइ छ। यद्यपि, सुरक्षा निकायले भने यस्ता अफवाह र घेराबन्दीबाट विचलित नभई लागूऔषध र तस्करीविरुद्धको अभियानलाई अझ कडाइका साथ अघि बढाउने प्रतिबद्धता जनाएको छ।

सशस्त्र प्रहरी उपरीक्षक लव सापकोटाले दिनुभएको जानकारी अनुसार सशस्त्रले सिमानाकामा कडाइ गरेकोले तस्करहरु त्रसित बनेका छन् । तस्कर र लागू ओषध काराेबारीकाे जालो ताेड्न सशस्त्र प्रहरी लागि परेको उहाँले बताउनुभयो ।